Кыргызстандын бийлиги «Ата-Бейит» мемориалдык комплексин өнүктүрүү концепциясын ачык архитектуралык сынак аркылуу иштеп чыгууну демилгелейт. Бул тапшырманын аткарылышын мамлекеттик катчы Арслан Койчиев көзөмөлдөйт.
Комплекстин инфраструктурасын өнүктүрүүгө коюлган талаптар
Сынактын негизги милдети — мемориалдык комплекстин тарыхый жана рухий маанисин сактоо менен бирге, улуттук эстутумду чагылдырган заманбап архитектуралык мейкиндик түзүү. Катышууга архитекторлор, долбоорлоо жана шаар куруу уюмдары, инженерлер, дизайнерлер, илимий-изилдөө мекемелери жана чыгармачыл жамааттар чакырылат.
Концепцияны иштеп чыгууда эмнелер эске алынышы керек
- Тарыхый келбетти жана учурдагы мемориалдык объектилерди сактоо
- Аймакты жашылдандыруу менен архитектуралык өнүктүрүү жана жакшыртуу
- Транспорттук жана инженердик инфраструктураны өркүндөтүү
- Эскерүү иш-чараларын өткөрүү жана расмий делегацияларды кабыл алуу үчүн шарттарды түзүү
- Ден соолугунун мүмкүнчүлүктөрү чектелген адамдар үчүн жеткиликтүүлүктү камсыз кылуу
Катышуучулар комплексти өнүктүрүүнүн архитектуралык концепциясын жана аймактын башкы планын гана эмес, сунушталган объектилердин эскиздик долбоорлорун, ошондой эле визуализациялык материалдарды жана түшүндүрмө жазууларды да тапшырышы керек.
