Камбар-Ата ГЭС-1дин масштабдуу энергетикалык долбоорун ишке ашырууга даярдык этабы аяктады. Бул иштердин алкагында кийинки курулуш үчүн зарыл болгон инфраструктура түзүлдү.

Объектте эмнелер жасалды

Энергетика министринин биринчи орун басары Курсантбек Өмүрбеков «Биринчи радио» эфирде билдиргендей, адистер аянтчаны даярдоо боюнча бир катар негизги милдеттерди аткарышты. Тактап айтканда, курулуш процессин жана станциянын келечектеги ишин камсыз кылуу үчүн зарыл болгон объекттер курулду.

  • Курулуш шаарчасы курулду
  • ГЭСке кирүү жолу өткөрүлдү
  • Транспорттук тоннелди өткөрүү аяктады
  • Подстанция курулду
  • 110 кВ чыңалуулуу электр берүү линиялары өткөрүлдү

Кийинки кадамдар

Учурдагы этапта ведомствонун негизги күч-аракети инвестицияларды издөөгө жана эл аралык кызматташтыкка багытталган. Министрдин орун басарынын айтымында, учурда долбоорду каржылоо маселелери боюнча кошуна мамлекеттер менен сүйлөшүүлөр жүрүп жатат.