Turmush басылмасынын маалыматына ылайык, Кант шаарында жол кырсыгынан 27 жаштагы Фаиза Кыдырбаева аттуу кыз каза болду. Окуя 21-майда кечки саат 22:30 чамасында болгон.

Маркумдун апасы Чолпон Кадырованын айтымында, алар жол кырсыгына күбө болгондорду, ошондой эле видео жана фотоматериалдарды издеп жатышат.

Азыр сот процесси жүрүп жатат. Айдоочу эч кандай жаракат алган эмес. Унаадагы үч жүргүнчүнүн экөөсү денесинен жаракат алып, буттары жана кабыргалары сынган. Фаизанын болсо 4 кабыргасы сынып, 2,5 литр кан жоготкон. Кызым ооруканага жеткенче тирүү болгон, бирок реанимация бөлүмүнө алып барышканда каза болгон. Ушул окуяга күбө болгондордон же видео/фото материалдары барлардан жардам сурайбыз.
Чолпон Кадырова, Фаиза Кыдырбаеванын апасы

Фаиза Кыдырбаева буга чейин Кант шаардык мэриясында, андан кийин бир жыл салык кызматынын бөлүмүндө иштеген. Ал үй-бүлөсүнүн жалгыз кызы болгон, апасы аны жалгыз тарбиялаган. Атасы буга чейин каза болгон.

Чүй облустук Ички иштер башкы башкармалыгынын маалыматына ылайык, 21-майда саат 23:53тө Ысык-Ата райондук Ички иштер бөлүмүнө Кант шаарындагы Куренкеев жана Ленин көчөлөрүнүн кесилишинде унаа турак үйгө урунуп, андан соң өрттөнүп кеткен жол кырсыгы тууралуу билдирүү келип түшкөн.