Кыргыз-Өзбек өнүктүрүү фондуна жакын арада кошумча 200 миллион доллар бөлүнөт, деп билдирди Улуттук инвестициялар боюнча агенттиктин башчысы Равшан Сабиров.
Азыркы учурда Кыргызстан менен Өзбекстандын ортосундагы соода жүгүртүүсү болжол менен 1,2 миллиард долларды түзөт. Мекемелер бул көрсөткүчтү 2 миллиард долларга чейин көтөрүүнү максат кылууда.
Фонддун ичинен 37ден ашуун биргелешкен ишканалар кызмат кылаары белгиленди. Алардын катарында соода-логистикалык борборлор, айыл чарба жана агроөнөр жай комплекстери, инфраструктуралык объектилер жана туризм жаатындагы демилгелер бар.
Сабиров жаңы бөлүнчү каражаттар 11 долбоорду жүзөгө ашырууга арналарын айтты. Мындан тышкары, эки тараптуу мамилелерди өнүктүрүү үчүн жаңы документтерге кол коюлган.
Ал инвестицияларды тартуу боюнча Кыргызстанда түзүлгөн жагымдуу шарттарга токтолуп, бул кызматташтык эки өлкөнүн соода байланыштарын олуттуу күчөтөөрүнө ишенем деп белгиледи.
