Манила шаарында 18–19-ноябрда балдарга карата зомбулукту токтотуу боюнча Экинчи глобалдык министрлер конференциясы өттү. Бул иш-чара Филиппин Өкмөтү тарабынан Дүйнөлүк саламаттык сактоо уюму, ЮНИСЕФ жана БУУнун атайын өкүлү менен биргеликте уюштурулду.
Кыргызстандын үч негизги милдеттенмеси
Конференция учурунда Кыргызстан зомбулуктун алдын алуу жана үй-бүлөлөрдү колдоо максатында төмөнкү багыттарды сунуштады:
- Билим берүү тутумуна позитивдүү ата-энелик тарбия программаларын киргизүү (дене жазасын жоюу жана ишенимдүү мамиле түзүү үчүн)
- Мектептерде психологиялык кызматтарды өнүктүрүү жана адистердин квалификациясын жогорулатуу
- Балдарды коргоо тутумун санариптештирүү жана ведомстволор аралык маалымат алмашууну күчөтүү
Эл аралык кызматташтык
Асель Чынбаева конференциянын алкагында ЮНИСЕФтин балдарды коргоо жана миграция боюнча директору Шима Сен Гупта жана БУУнун Балдардын укуктары боюнча комитетинин төрайымы Софи Киладзе менен жолугушту. Тараптар балдардын укуктарын коргоо жана эл аралык кызматташтыктын келечегин талкуулашты.

















