Түркиянын Анталья шаарында БУУнун климаттын өзгөрүшү боюнча алкактык конвенциясынын тараптарынын 31-конференциясынын (COP31) алкагында Борбордук Азиядагы маанилүү инфраструктуралык системаларга климатка туруктуу кызматташуу боюнча аймактык демилге (RECCIS-CA) талкууланды. Бул тууралуу Жаратылыш ресурстары, экология жана техникалык көзөмөл министрлиги билдирди.
Климаттык коркунучтар жана экономикалык зыян
Жаратылыш ресурстары, экология жана техникалык көзөмөл министрлигинин орун басары Асель Раимкулова климаттын өзгөрүшү аймактагы мамлекеттердин экономикалык туруктуулугуна жана коопсуздугуна таасир этүүчү негизги факторлордун бири болуп жатканын белгиледи.
Анын айтымында, Борбордук Азияда температура дүйнөлүк орточо көрсөткүчкө караганда дээрлик эки эсе тездик менен жогорулоодо. Бул процесс аймакка жыл сайын чоң экономикалык чыгымдарды алып келүүдө.
Климаттык көрсөткүчтөр
Аймактагы кургакчылык, сел, жер көчкү, бийик тоолуу көлөрдүн ташкыны жана экстремалдык ысык климаттык кризистин кесепеттерин күчөтүүдө.
Кызматташтыкты чыңдоо
Кыргызстан RECCIS-CA демилгесин Борбордук Азия мамлекеттеринин ортосундагы кызматташтыкты чыңдоо жана климаттык тобокелдиктерди бирдиктүү түрдө түшүнүү үчүн маанилүү платформа катары кабыл алып, аны колдоду.
Ошондой эле Асель Раимкулова эл аралык уюмдарга, көп тараптуу өнүктүрүү банктарына жана климаттык фонддорго бул демилгени калыптануу этабында гана колдоп, аймактык диалогду натыйжалуу ишке ашырууга катышууну сунуштады.










