Кыргызстандын Өзгөчө кырдаалдар министрлиги (ӨКМ) Ысык-Көлдүн жээгинде сууда болгон кырсыктардын алдын алуу максатында күн сайын алдын алуу иш-чараларын жүргүзүүдө. Бул тууралуу ведомстводон билдиришти.
Туристтик сезондун кызуу мезгилинде куткаруучулар Ысык-Көл облусунун бардык райондорундагы пляждарды жана эс алуучу жайларды кыдырып жатышат. Алар эс алуучулар, туристтер жана аймактын коноктору менен түшүндүрүү иштерин жүргүзүп, сууда өзүн коопсуз алып жүрүү эрежелерин эске салышат.
Жарандарга буйкалардан ары сүзбөөгө, балдарды кароосуз калтырбоого, мас абалында сууга түшпөөгө, ошондой эле сапборддорду, катерлерди, гидроциклдерди жана башка сүзүүчү каражаттарды колдонууда этияттык чараларын сактоого кеңеш берилет. Куткаруучулар өзгөчө куткаруучу жилеттерди милдеттүү түрдө колдонууга көңүл бурушат.
Мындан тышкары, ӨКМ кызматкерлери суу техникасын ижарага берүүчү жайлардын ээлери жана кызматкерлери менен алдын алуу баарлашууларын өткөрүшөт. Аларга ар бир кардарды куткаруучу жилет менен камсыз кылуу, сууга чыгуу алдында коопсуздук боюнча нускама өткөрүү жана коопсуздук талаптарын бузган адамдарды сүзүүчү каражаттарды колдонууга жол бербөө зарылдыгы эскертилет.
Рейддердин негизги максаты – коопсуз эс алуу маданиятын жогорулатуу, сууда болгон кырсыктардын алдын алуу, ошондой эле жарандардын өмүрүн жана ден соолугун сактоо.
Ведомство өлкөнүн жашоочуларын жана конокторун өз коопсуздугуна жоопкерчиликтүү мамиле кылууга, сууда жүрүү эрежелерин сактоого жана куткаруучулардын сунуштарына кулак салууга чакырды.
