Кыргызстанда азык-түлүк жана курулуш товарларынын бааларынын кескин көтөрүлүшүнө жол бербөө максатында чаралар көрүлүүдө. Бул тууралуу 13-августта президент Садыр Жапаров MediaHub каналына берген маегинде билдирди.
Анын айтымында, өлкөдө эттин баасын 650-700 сомдун чегинде кармоо зарылдыгы коюлуп, бул багытта 500 миллион сомдук бөлүм каралган.
«Биз мүмкүнчүлүктөрүбүзгө жараша бааларды учурдагы деңгээлде кармоого аракет кылабыз. Азык-түлүк жана курулуш материалдарынын баалары кескин көтөрүлбөсүн үчүн чараларды көрөбүз», — деди Садыр Жапаров.
Анын белгилешинче, элдин чыгымдарын кармап туруу үчүн электр энергиясынын тарифтери да маанилүү факторы болуп саналат. Бүгүнкү күндө өлкөдө өндүрүлгөн электр энергиясы арзан жана бир киловатт–саатка 1 сом 37 тыйын төлөнөт.
«Көптөгөн мамлекеттерде электр энергиясынын тарифтери болжол менен 5 сомдун тегерегинде болсо, бизде ал бир топ төмөн», — дейт президент.
Ошондой эле Садыр Жапаров Кыргызстанда эң негизги тогуз азыктын алтысынын ички керектөөнү толук камсыз кыла алат экенин белгиледи. Калган үч азык импорто аркылуу камсыздалып келет, бирок бул багытта да иштер улантуу пландалууда.
