Манас Арапов Сокулук районунун Төмөнкү Чүй айылында жашайт жана көп жылдан бери айыл чарбасында иштейт. Былтыр ал пиязды 7 гектар жерге эгип, жакшы киреше тапкан.
Учурда ал пияз эгүүчү аянтын 16 гектарга көбөйттү. Манас Арапов пияз өстүрүү көп эмгек талап кылбаса да пайда алып келерин, пиязды кышында оңой сактоо жана рынокто каалаган убакта сатууга мүмкүнчүлүк түзөрүн айтты.
Ошондой эле ал тамчылатып сугаруу ыкмасын колдонуп, суу ресурстарын үнөмдөө менен түшүмдүүлүктү жогорулатууну максаттады. Былтыр анын талааларынан гектарына болжол менен 88–90 тонна пияз жыйналган.
Азыркы жылы фермер гектарынан 100 тоннадан ашык пияз алганды көздөп жатат. Айыл чарба иштеринде жергиликтүү тургундар жумушка тартылат.
Өскөн пияз негизинен Кыргызстандын ички базарына сатылат, ошондой эле Россия жана башка өлкөлөргө экспорттоо пландалууда. Манас Арапов айыл чарба кооперативинин мүчөсү жана пияз өстүрүүгө адистешкен.
