Кыргызстан менен Өзбекстандын ортосундагы мамлекеттик чек ара чечими эки тарап үчүн тарыхый саясий жетишкендик болуп саналат. Бул чечим көп жылдардан бери уланып келген талаш-тартышты жоюп, аймакта туруктуулукту жана коопсуздукту чыңдады.
Бул иштердин жыйынтыгы менен эки өлкөнүн мамилелери жаңы деңгээлге чыгып, соода-экономикалык, инвестициялык жана гуманитардык кызматташтыкты ылдамдыруу үчүн кеңири мүмкүнчүлүктөр ачылды.
Чек ара линиясын тактоо процесси
Кыргыз-өзбек мамлекеттик чек арасынын узундугу жалпы 1 378 километрди түзөт. 2017-жылга чейин 85% участкалары такталып, калган татаал аймактар президент Садыр Жапаровдун бийликке келгенден кийин чечилген.
2021-жылдын март айында Садыр Жапаровдун Өзбекстанга мамлекеттик сапары учурунда чек ара маселеси боюнча сүйлөшүүлөр активдешти. 2022-жылдын ноябрында Жогорку Кеӊеш кыргыз-өзбек чек арасы тууралуу келишим долбоорун кабыл алган.
2023-жылдын январь айында Бишкекте Кыргызстан менен Өзбекстандын президенттеринин ортосунда ратификациялык грамоталар алмашылган. Бул чек ара маселесиндеги акыркы чечүүчү кадам болгон.
