Кыргызстандын Гидрометеорология кызматы өлкөнүн тоолуу жана этек-адыр аймактарында сел жана суу ташкыны коркунучу жогорулаганын билдирип, атайын эскертүү чыгарды.
Эскертүүгө ылайык, июлдун 21-күнүнөн 25-күнүнө чейин өлкөнүн бир катар региондорунда күчтүү жамгырлар жаайт. Мунун натыйжасында тоо этегиндеги жана тоолуу аймактарда сел жана суу ташкыны пайда болуу тобокели бар.
Тиешелүү мамлекеттик органдар жана жергиликтүү бийликтер коркунучтуу аймактардагы тургундарды кырсыктан сактануу боюнча зарыл чараларды көрүүгө чакырылды.
