Кыргызстанда виртуалдык активдерди тейлөөчү провайдерлердин жалпы айланмасы 2026-жылдын алтынчы айына карата 2 триллион 244 миллиард сомду түздү. Бул тууралуу 24.kg сайтына Мамлекеттик финансылык көзөмөлдөө боюнча комитет кабарлады.
2025-жылдын алты айындагы көрсөткүч 820 миллиард 690 миллион сомдун тегерегинде болсо, жыл аягына карата 2 триллион 735 миллиард сомдон ашкан. Бул жылы жүргүзүлгөн операциялардын саны 3 миллион 865 миңден ашты.
Операциялардын басымдуу бөлүгүн алмашуу операторлору жүргүзүп, алардын жалпы айланмасы 2,209 триллион сомду түздү, ал эми криптобиржалар 34,7 миллиард сомдон ашык соода көлемине жетишти.
Мамфинаранын төрагасы Кайрат Маматовдун айтымында, азыр виртуалдык активдер секторун лицензиялоо жана жөнгө салуу функциялары Кыргыз Республикасынын президентинин алдындагы Виртуалдык активдер жана блокчейн технологиялары боюнча улуттук агенттигине өттү.
Бирок рыноктун көзөмөлү Мамфинарага таандык болуп, талаптарга жооп бербеген компаниялар лицензиясынан ажыратылып жатат. Жакында бир криптобиржа лицензиясынан айырылды, себеби ал лицензия алгандан кийин жыл ичинде өз ишин баштаган жок.
Ошондой эле, июль айынан баштап криптобиржалардын капиталдык талаптары 300 миллион доллардан кем болбошу керек экендиги белгиленип, талапка жооп бербеген компаниялар лицензиясынан ажыратылары айтылды.
