Билим берүү министрлигинин маалыматына ылайык, Кыргызстанда «Улуттук коомдоштук демилгелер долбоорунун» (УКДД) чегинде 18 жаңы бала бакча курулат, ошондой эле дагы төрт мектепке чейинки билим берүү мекемесине капиталдык оңдоо иштери жүргүзүлөт.

Ведомстводон билдиришкендей, долбоорду ишке ашыруу маселеси Билим берүү министри Догдуркүл Кендирбаева, Коомдоштуктарды өнүктүрүү жана инвестициялоо агенттигинин (АРИС) аткаруучу директору Калыбек Жумадилов жана УКДДнын координатору Майрамбек Баялиевдин катышуусунда талкууланды. Жолугушуунун жүрүшүндө өлкөнүн аймактарында мектепке чейинки билим берүү уюмдарын куруу боюнча долбоордук чечимдер каралды.

Догдуркүл Кендирбаева жаңы бала бакчаларды долбоорлоодо заманбап жана коопсуз, балага багытталган чөйрөнү түзүү артыкчылыктуу багыт болушу керектигин баса белгиледи. Анын айтымында, долбоорлор жашылдандырылган аймактарды, жаратылыш материалдарынан жасалган оюн аянтчаларын, улуттук баалуулуктарды чагылдырган элементтери бар ички жасалгаларды, сапаттуу жана коопсуз эмеректерди колдонууну, өрт коопсуздугунун талаптарын сактоону жана инклюзивдик чөйрөнү түзүүнү караштырышы керек.
Билим берүү министри Догдуркүл Кендирбаева
АРИСтин аткаруучу директору Калыбек Жумадилов жолугушууда айтылган бардык сунуштар долбоорду ишке ашырууда эске алынарын ишендирди.