Ысык-Көл облусунун Жетөгүз районунда жайгашкан Жетөгүз айылынан курортко чейинки жолду реконструкциялоо иштери башталды. Жалпы узундугу 17 чакырымды түзгөн бул жолдун айрым бөлүктөрү төрт тилкелүү, калгандары эки тилкелүү болуп курулат.
Долбоорго ылайык, жолдун оң тарабында велосипед айдоочулар үчүн өзүнчө веложол жана жөө жүргүнчүлөр үчүн тротуар курулат. Бул эс алуу зонасына келген туристтердин жана жергиликтүү тургундардын коопсуз жүрүүсүн камсыз кылат.
Реконструкциянын алкагында жолдун инженердик инфраструктурасы жаңыланып, жээктери тартипке келтирилет. Иштердин максаты — туристтик аймакка жетүүнү жакшыртуу жана жайкы туристтик мезгилде тыгындарды азайтуу болуп саналат.
Учурда курулуштун баштапкы этабында жер жумуштары жана жолдун негизин даярдоо иштери жүрүүдө. Долбоорду толугу менен 2027-жылы аяктоо пландаштырылууда.
