Кыргызстандын Эл аралык жогорку медицина мектебинин экономика жана өнүктүрүү боюнча проректору Толонбек Абдыров ШКУнун Медиа жана аналитикалык борборлор форумунун пленардык жыйынынын экинчи бөлүгүндө чыгып сүйлөп, уюмдун өлкөлөрүнүн жасалма интеллект, илим жана билим берүү тармагындагы кызматташуусун өнүктүрүүнү сунуштады.
Анын айтымында, эгерде тарыхый Улуу Жибек Жолу өлкөлөрдү соода, билим жана маданият алмашуу аркылуу бириктирген болсо, анда бүгүнкү күндө жасалма интеллект мамлекеттерди инновациялар, билим берүү жана илимий изилдөөлөр аркылуу байланыштырган жаңы санариптик Жибек Жолу боло алат.
Ал Жибек Жолунун өлкөлөрүнүн жасалма интеллект университеттеринин жана изилдөө борборлорунун тармагын түзүүнү, биргелешкен илимий изилдөөлөрдү жүргүзүүнү жана инновациялык долбоорлорду ишке ашырууну сунуштады.
Мындан тышкары, проректор заманбап билим берүү программаларын, илимий лабораторияларды жана жасалма интеллект жаатындагы адистерди даярдоочу платформаларды бириктире турган бирдиктүү санариптик билим берүү мейкиндигин түзүү демилгесин көтөрдү. Ошондой эле, ал студенттер, окутуучулар жана изилдөөчүлөр алмашууну камтыган академиялык мобилдүүлүктү кеңейтүү да маанилүү багыт болушу керек деп эсептейт.
