Астанада жасалма интеллект боюнча III эл аралык олимпиаданын салтанаттуу ачылыш аземи өттү. Иш-чаранын катышуучуларын Казакстандын Президенти Касым-Жомарт Токаев куттуктап, өлкө санариптик өнүгүүгө стратегиялык багыт алганын баса белгиледи.
Президенттин айтымында, «БУУнун электрондук өкмөттү өнүктүрүү индексинде Казакстан 193 мамлекеттин ичинен 24-орунду ээлейт. Жаңы технологияларды киргизүүгө даярдык деңгээли боюнча өлкө Борбордук Азияда алдыңкы орунда турат. Биз жасалма интеллект мамлекетти, экономиканы, бизнести башкаруунун маанилүү куралы болуп, коомдук турмуштун бардык чөйрөлөрүнө тарап жаткан бирдиктүү инновациялык экосистеманы түзүп жатабыз».
Токаев былтыркы кайрылуусунда Казакстанды үч жылдын ичинде толук кандуу санарип мамлекетке айлантуу милдетин койгонун эске салды. «2026-жылды Санариптештирүү жана жасалма интеллект жылы деп жарыялоо ушул стратегиялык милдетти чечүүгө багытталган. Андан тышкары, өлкөнү инновацияларга таянып өнүктүрүү курсу 1-июлда күчүнө кирген Казакстандын жаңы Конституциясында так жазылган. Бирок бул бардык процесстердин башталышы гана», — деди мамлекет башчысы.
Президент Казакстан сапаттуу билим берүүгө жана таланттуу балдарды ар тараптуу колдоого өзгөчө көңүл бурарын белгиледи. Анын айтымында, былтыр Пекинде өткөн жасалма интеллект олимпиадасында казакстандык окуучулар үч байгеге ээ болушкан.
Telegram мессенжеринин негиздөөчүсү Павел Дуров Астанадагы олимпиаданын жеңүүчүлөрүнө Telegram компаниясынан 106,5 миң доллардан ашык суммадагы сыйлыктарды жөнөтөрүн билдирди. Бул тууралуу ал өзүнүн расмий Telegram-каналында жазды.
Жасалма интеллект боюнча эл аралык олимпиада Астанада 2-августтан 8-августка чейин өттү. Ага 106 өлкөдөн 500гө жакын окуучу, насаатчы жана калыстардын мүчөлөрү катышты. Мындай деңгээлдеги мелдештер Борбор Азияда биринчи жолу өткөрүлдү.
