Баткен облусунда 40 күндүк «Биримдик кербени» улуттук жүрүшү расмий түрдө башталды. Бул иш-чара VI Дүйнөлүк көчмөндөр оюндарына даярдык көрүүнүн алкагында өткөрүлүүдө.
Долбоордун алгачкы иш-чарасы Лейлек районунун Тоо жайлоосундагы Шооваз ыйык булагынан суу чогултуу аземи болду. Салттуу жөрөлгө кыргыздын улуттук үрп-адаттары жана көчмөн маданиятынын элементтери менен коштолду.
Азем учурунда Шооваз булагынан алынган ыйык суу Лейлек районунан тандалып алынган он атчанга салтанаттуу түрдө тапшырылды. Алар 25-июлда Раззаков шаарынан 40 күндүк улуттук сапарга аттанып, өлкөнүн аймактарын кыдырып чыгышат.
Иш-чарага Кыргыз Республикасынын Президентинин Баткен облусундагы ыйгарым укуктуу өкүлү Мамыржан Рахимов катышып, жергиликтүү элди долбоордун башталышы менен куттуктап, катышуучуларга ийгиликтүү жол каалады.
«Биримдик кербени» долбоорунун башкы максаты — кыргыз элинин биримдигин чыңдоо, анын тарыхын, көчмөн цивилизациясынын баалуулуктарын, улуттук салт-санааларын жана маданий мурастарын кеңири жайылтуу.
Долбоордун өзгөчөлүгү — Кыргызстандын 40 районунан чогултулган ыйык суулар өзүнчө салттуу көөкөрлөргө салынат. Ар бир райондон жүрүшкө 10дон атчан катышып, жалпысынан 400 катышуучу сууну өлкө аймагына жеткирет.
