Ирандын Улуттук коопсуздук боюнча Жогорку кеңешинин катчысы Мохаммад Багер Золькадрдын айтымында, Кошмо Штаттар өзүнүн жүрүм-турумун өзгөртмөйүнчө Ормуз кысыгы ачылбайт.
Тегеран тарабынан айтылган шарттар төмөнкүлөр:
- Иранга эч качан коркутуу жана ирандык ыйык жайларды мазактоо болбосун;
- Иранга жана анын Ливандагы, Палестинадагы, Йемендеги, Ирактагы өнөктөштөрүнө каршы согушту биротоло токтотуу;
- Деңиз блокадасын алып салуу жана Аскер-деңиз, Аскер-аба күчтөрүн чыгарып кетүү;
- Иранга келтирилген зыянды толугу менен төлөп берүү;
- Иранга каршы санкцияларды алып салуу;
- Тоңдурулган ирандык активдерди бөгөттөн чыгаруу.
Мохаммад Багер Золькадр Тегеран бул эрежелерден согушта да, сүйлөшүүлөрдө да кайтпай турганын кошумчалады.
The New York Times гезити америкалык президент Дональд Трамптын администрациясы бул талаптарга макул болору күмөн экендигин белгилейт. Басылманын эскертүүсү боюнча, июнь айында тараптар ортосунда жетишилген убактылуу тынчтык келишимине ылайык, санкциялар Ирандын өзөктүк программасы боюнча акыркы макулдашуу түзүлгөндө гана жокко чыгарылат. Тоңдурулган активдерге жетүү маселесине келсек, америкалык тараптын билдирүүлөрүнө караганда, Иран жогорку деңгээлде байытылган уран запасынан баш тартууга милдеттенсе гана аларга жетүүгө мүмкүнчүлүк алат.
