Ирандын билдирүүлөрү
Ислам революциясынын сакчылар корпусу (ИРСК) Кувейттеги америкалык армиянын радиоэлектрондук күрөш бөлүмүн жок кылганын жарыялады. Ошондой эле ирандык аскерлер Иорданиядагы америкалык абадан жана ракетадан коргонуу системаларына сокку урулганын маалымдады.
ИРСКнын маалыматы боюнча, Кувейттеги Аль-Удейри базасына сокку “Жеңиш-2” операциясынын 26-толкунунун алкагында жасалган. Иран тарап чабуулдун натыйжасында атайын радиоэлектрондук күрөш бөлүмү жок кылынып, америкалык аскер кызматкерлеринин арасында каза болгондор жана жарадар болгондор бар деп ырастоодо.
ИРСК ошондой эле базанын диспетчердик мунарасы жабыркаганын билдирди. Чет элдик маалымат каражаттарында Аль-Удейри объектиси Кувейттин түндүгүндөгү америкалык аскердик лагерь болгон Кэмп-Бюринг катары да белгиленет.
Мындан тышкары, ирандык аскерлер Иорданиядагы америкалык базада THAAD ракетадан коргонуу комплексинин радары, Patriot абадан коргонуу системасы жана C-RAM радары жок кылынганын жарыялады. Тегерандын ырастоосунда, соккулар ошондой эле отун резервуарларына, тик учак жабдууларын сактоочу кампага жана тик учактарды оңдоо жана тейлөө үчүн арналган ангарга тийген.
Көз карандысыз тастыктоонун жоктугу
Америкалык техниканын жок кылынгандыгы жана аскер кызматкерлеринин жоготуулары жөнүндөгү маалыматка көз карандысыз ырастоо азырынча жок. АКШнын аскерлери Иран жарыялаган зыяндын масштабын расмий түрдө тастыктаган жок. Иорданиянын бийликтери абадан коргонуу күчтөрү жети ракетаны жана алты учкучсуз учакты кармап, курмандыктар жана материалдык зыян жок экенин билдирди.
Өз кезегинде, АКШнын Куралдуу Күчтөрүнүн Борбордук командачылыгы Ирандын аймагына карата 13 түн ичиндеги соккулары аяктаганын маалымдады.
