Канатбек Чыныбаев Ысык-Көл районунун Ананьево айылында курулуп жаткан №33 жаңы өрт-куткаруу бөлүмүнүн имаратына барды. Ал жерден курулуш иштерин уюштуруу жана аткаруу боюнча бир катар тапшырмаларды берди.
Ошондой эле министр Ак-Суу районунун Боз-Учук айылындагы М. Чокуев атындагы орто мектептин жана Токтогул айылындагы А. Сыдыкбеков атындагы орто мектептин курулуштарын көрдү.
Министрликтин маалыматы боюнча, мектептердин курулушу Дүйнөлүк банктын колдоосу менен ӨКМ тарабынан ишке ашырылып жаткан ЭРИК долбоорунун алкагында жүрүп жатат. Бул долбоор сейсмикалык туруктуу мектеп инфраструктурасын жаңылоого жана өлкөнүн жаратылыш кырсыктарынын тобокелдиктерине туруктуулугун жогорулатууга багытталган. Долбоордун алкагында республика боюнча 23 мектеп курулуп, дагы 17 мектеп реконструкцияланат.
Мындан тышкары, Канатбек Чыныбаев Ак-Суу районунун Жыргалаң айылындагы "Ала-Тоо Резорт" курортунун аймагында Кыргызгидрометтин кар көчкү станциясынын курулуш иштеринин жүрүшү менен да таанышты. Бардык объекттерди кыдыруунун жыйынтыгында министр жооптуу кызматкерлерге тиешелүү тапшырмаларды берди.
