Кыргызстандын президенти «Кыргыз Республикасынын Конституциялык соту жөнүндө» мыйзамына өзгөртүүлөрдү киргизүү тууралуу мыйзамга кол койду.
Киргизилген өзгөртүүлөр Конституциялык сотко кайрылууларды кароо, иштерди даярдоо жана соттун чечимдерин аткаруу тартибин жөнгө салат.
Эми Конституциялык сотко кайрылуу ыйгарым укуктуу адамдын колу коюлган жазуу түрүндө же регламенттин талаптарына ылайык электрондук түрдө берилиши мүмкүн.
Ошондой эле келип түшкөн кайрылууларды кароо тартиби да тартипке салынды. Конституциялык соттун төрагасы кайрылууну бир судьяга текшерүүгө тапшырышы керек. Кайрылууну өндүрүшкө кабыл алуу же кабыл алуудан баш тартуу жөнүндө чечим документ катталган күндөн тартып 30 күндөн кечиктирбестен, жыйынга катышкан судьялардын көпчүлүк добушу менен кабыл алынат.
Иштерди кароого даярдоо мөөнөттөрү судья-баяндамачы тарабынан аныкталат. Бул иштин категориясына жараша эки жумадан эки айга чейин созулушу мүмкүн.
Айрым категориядагы иштерди жазуу жүзүндө кароо тартиби мыйзамдаштырылды. Мисалы, Конституцияны расмий чечмелөө, эл аралык келишимдердин конституциялуулугун текшерүү, мамлекеттик бийлик бутактарынын ортосундагы компетенциялар жөнүндө талаш-тартыштар, Конституцияга өзгөртүүлөрдү киргизүү долбоорлоруна корутунду берүү, президентке импичмент жарыялоо тартибинин сакталышы, судьялардын конкреттүү ишти чечүүгө байланыштуу нормативдик актынын конституциялуулугу жөнүндө суроо-талаптары, Конституциялык соттун чечимдерин кайра кароо, Конституциялык соттун чечимдерин жана корутундуларын түшүндүрүү иштери ушундай тартипте каралат.
