«Бир Дүйнө – Кыргызстан» уюму Азимжан Аскаровдун каза болгон күнүнө карата бийликти анын өлүмүнүн жагдайларын объективдүү иликтөөгө жана сот чечимдерин, БУУнун Адам укуктары боюнча комитетинин сунуштарын аткарууга чакырды.
Азимжан Аскаров 2020-жылдын 25-июлунда Жаза аткаруу мамлекеттик кызматынын №47 мекемесинде каза болгон. «Бир Дүйнө – Кыргызстан» уюмунун билдирүүсүнө караганда, алты жыл өткөндөн кийин да мамлекет анын өлүмү боюнча толук жана көз карандысыз иликтөө жүргүзгөн эмес.
Укук коргоочулардын айтымында, 69 жаштагы Аскаровдо оорунун оор симптомдору пайда болгондо, ал өз убагында медициналык жардам ала алган эмес. Уюмдун ырастоосунда, адвокаттардын аны ооруканага жаткыруу жана текшерүү өтүнүчтөрү жоопсуз калган.
Маалыматка ылайык, Аскаров каза болордон бир күн мурун №47 мекемеге которулуп, ал жерде ага «тастыкталбаган COVID-19» диагнозу коюлуп, кычкылтекке туташтырылган.
Укук коргоочулар ошондой эле адвокаттар Аскаровдун дарыгерлерин, конвоирлерин жана камералаштарын суракка алууну, ошондой эле медициналык документтерди изилдөөнү бир нече жолу сурашканын билдиришти. Алардын маалыматы боюнча, соттор тергөө органдарынын аракетсиздигин алты жолудан ашык мыйзамсыз деп тааныган.
Уюмдун айтымында, акыркы мындай чечимди Бишкек шаарынын Биринчи Май райондук соту 2025-жылдын 3-февралында чыгарган, бирок ал дагы деле аткарылган эмес.
«Бир Дүйнө – Кыргызстан» уюму бул иште Жарандык жана саясий укуктар жөнүндө Эл аралык пакттын жоболору бузулган деп эсептейт. Уюм ошондой эле БУУнун Адам укуктары боюнча комитетинин чечимин эске салды.
