Бишкек шаарында Threads социалдык тармагында мыйзамсыз митингдерге жана массалык башаламандыктарга үндөгөн материалдарды жарыялаган деп шектелген жаран кармалды. Шаардык Ички иштер башкы башкармалыгынын (ШИИББ) билдирүүсүнө ылайык, бул факты боюнча кылмыш иши козголду.
Милициянын мониторинги учурунда “Slivy_telegramm” аталышындагы аккаунт аныкталган, ал мурда “beksultankg99” деп аталган. ШИИББ бул баракчада кытай жарандарына карата терс маанайдагы материалдар жана коомдук тартипти бузууга алып келиши мүмкүн болгон аракеттерге чакырыктар дайыма жарыяланып турганын билдирди.
Атап айтканда, милициянын маалыматы боюнча, бул аккаунт аркылуу 23-июлга Ала-Тоо аянтына пландаштырылган мыйзамсыз митингге катышууга чакырыктар таратылган.
Бул окуя Кыргыз Республикасынын Кылмыш-жаза кодексинин 278-беренесинин 3-бөлүгү («Бийлик өкүлдөрүнүн мыйзамдуу талаптарына активдүү баш ийбөөгө, массалык башаламандыктарга жана жарандарга карата зомбулукка чакырыктар») боюнча кылмыш ишин козгоого негиз болгон.
Ыкчам-издөө иш-чараларынын жүрүшүндө милиция кызматкерлери аккаунттун болжолдуу ээсин аныкташкан. Ал 2003-жылы туулган О.А. аттуу жаран экени белгилүү болгон. Ал Бишкек ШИИББдин тергөө кызматына жеткирилген.
Ведомствонун маалыматына караганда, кармалган жаран өз ыктыяры менен iPhone 14 Pro үлгүсүндөгү телефонун кароо үчүн берген. Кийинки тергөө иш-чараларында дагы үч мобилдик телефон жана ноутбук алынган. Бул техникалар ишке заттык далил катары кошулду.
