Социалдык тармактарда Ысык-Көлдөгү "Мурок" пансионатынын жээгинде Казакстандан келген турист менен пансионаттын кызматкерлеринин ортосунда чыккан жаңжалдын видеосу жарыяланды. Бул тууралуу Ulysmedia.kz билдирди.
Окуяга күбө болгондордун айтымында, күндүз жээкте Казакстандан келген турист менен пансионаттын аймагында иштеген жашы жете элек кыздардын ортосунда оозеки чыр чыккан. Алдын ала маалыматтарга ылайык, чырдын себеби шамал учуруп келген таштанды болгон. Күбөлөр кайым айтышуу тез эле мушташка айланып кеткенин айтышат.
Социалдык тармактарда 14 жаштагы кыз жабыркаганы тууралуу да маалыматтар тараган. Жарыялардын авторлору кыз мээси чайкалып, мурду сынганын жана ооруканада экенин айтышат. Бул маалымат азырынча расмий тастыктала элек.
Threads тармагында Ташкенттен келген бир аялдын айткандары жарыяланды. Ал окуя болгон жерде жакын жерде болгонун жана болгон окуяны өз көзү менен көргөнүн билдирген. Анын айтымында, талаш турист таштандыны тазалоону талап кылгандан кийин башталган. Кыздар таштанды алардын эмес экенин айтышса да, тазалайбыз деп убада беришкен. Оозеки кайым айтышуудан кийин, күбөнүн айтымында, аял кыздардын бирин моюнунан кармаган.
