Кыргызстандын Министрлер Кабинети тышкы шоктордун жана дүйнөлүк отун бааларынын өсүшүнө байланыштуу 2026-жылга карата инфляциянын расмий болжолун 9 пайыздан 14-15 пайызга чейин көтөрдү.

Биринчи вице-премьер-министр Данияр Амангельдиевдин айтымында, эгер мамлекеттик жөнгө салуу толугу менен алынып салынса, АИ-92 үлгүсүндөгү бензиндин рыноктук баасы бир литри 114 сомду, ал эми дизелдик отун 148 сомду түзмөк. Баалардын кескин өсүшүнө жол бербөө үчүн өкмөт мунай трейдерлеринин чыгымдарынын бир бөлүгүн бюджеттен компенсациялайт.

Өлкөдөгү отун запасы бир жарым айга чейин көбөйтүлдү (максат – 2,5 ай). Беларусь жана Кытай менен келишимдер түзүлүп, Өзбекстан менен мунайды кайра иштетүү боюнча сүйлөшүүлөр жүрүүдө. Ошондой эле, Россиядан 200 миң тонна мунайды жана Казакстандан мазутту жеңилдетилген шартта жеткирүү боюнча сүйлөшүүлөр уланууда.

Жашоо минимуму (экинчи квартал)

9 873,28сом (айына)
11 063,15сом (эмгекке жарамдуулар)
11 320,67сом (эркектер)
11 005,42сом (аялдар)
6 417,63сом (азык-түлүккө)

Жашоо минимумунун эң жогорку көрсөткүчү Бишкек шаарында (10 миң 229,91 сом), ал эми эң төмөнкүсү Талас облусунда (8 миң 784,97 сом) катталды.

Президент Садыр Жапаров республиканын жалпы мамлекеттик карызы ИДПнын 39 пайызына барабар экенин билдирди (2020-жылга чейин 120 пайыз болгон). Президент Министрлер Кабинетине мамлекеттик карыздын чегин ИДПнын 50 пайызынан жогору койбоону тапшырды.

Садыр Жапаров келечектеги Кытай – Кыргызстан – Өзбекстан темир жолун өлкөнү транспорттук туюктан чыгарып, «Кумтөр» менен теңдеш транзиттик кирешелерди камсыз кыла турган негизги долбоор деп атады.