Кыргызстандын тоолорунда дайынсыз жоголгон альпинисттер тобунун арасында Беларусиянын эки жараны жана Латвиянын бир жараны бар. Спортчулар Курумды чокусуна Түндүк кыр аркылуу татаал маршрут менен чыккандан кийин байланышка чыкпай калышкан.
4-августта альпинисттер чокуга ийгиликтүү чыгып, оператору менен байланышка чыгышкан. Алар түшүүгө толугу менен даяр экенин жана базалык лагерге түшө баштаганын билдиришкен.
Бирок белгиленген убакта топ контролдук пунктка келген эмес. Андан кийин альпинисттер менен байланыш толугу менен үзүлүп, алардын учурдагы жайгашкан жери белгисиз бойдон калууда.
Беларусиянын альпинизм жана аскага чыгуу федерациясы Кыргыз Республикасынын кесиптештерине жоголгон топту издөөгө жардам берүү өтүнүчү менен кайрылган.
Мамлекеттик Туризмди өнүктүрүү агенттигинин директору Эдуард Кубатов бул кырдаал тууралуу Кыргызстандын ӨКМ жана ИИМ маалымдалганын билдирди. Анын айтымында, альпинисттерден турган коомдук куткаруу тобу түзүлгөн. «ӨКМнын мониторингинин жыйынтыгын күтүп жатабыз, издөө жана куткаруу иштерине чыгууга даярбыз», — деди ал.
Учурда альпинисттерди издөө жана аймакты текшерүү үчүн издөө-куткаруу тобу даярданып жатат.
