Кыргыз Республикасынын Президенти Садыр Жапаров бүгүн, 24-июлда, Чолпон-Ата шаарында Кытай Эл Республикасынын тышкы иштер министри Ван И менен жолугушту. Жолугушуунун жүрүшүндө эки өлкөнүн ортосундагы соода-экономикалык, инфраструктуралык, транспорттук-логистикалык жана маданий-гуманитардык кызматташтык маселелери талкууланды.
Ал Кыргызстан Кытайды маанилүү өнөктөштөрдүн бири катары карап, эки өлкөнүн жана элдердин кызыкчылыктарына жооп берген өз ара пайдалуу кызматташтыкты өнүктүрүүнү ырааттуу түрдө колдоорун баса белгиледи. Кытай менен биргеликте транспорт, инфраструктура, соода жана инвестиция тармагындагы долбоорлорду ишке ашыруу Кыргызстандын туруктуу экономикалык өнүгүүсү, жаңы жумуш орундарын түзүү жана жарандардын бакубаттуулугун жогорулатуу үчүн маанилүү экенин айтты.
Президент белгилегендей, Кыргызстан инвесторлор үчүн жагымдуу шарттарды ырааттуу түзүп, керектүү инвестициялык климатты камсыз кылууда.
Ошол эле учурда, Садыр Жапаров бардык чет өлкөлүк компаниялар, анын ичинде Кытайдын катышуусундагы ишканалар да Кыргыз Республикасынын мыйзамдарын так сактоого, кыргыз элинин каада-салттарын жана маданиятын урматтоого, ошондой эле мыйзамдуулук жана ачык-айкындуулук принциптерине ылайык иш алып барууга милдеттүү экенин өзгөчө баса белгиледи.
Өз кезегинде Кытайдын тышкы иштер министри Ван И Садыр Жапаровго жылуу кабыл алгандыгы үчүн ыраазычылык билдирип, Кытай Эл Республикасынын Төрагасы Си Цзиньпиндин саламдашуусун жана эң жакшы каалоолорун мамлекет башчыга жеткирди.
Ван И жогорку деңгээлде жетишилген макулдашууларды ишке ашырууга даярдыгын баса белгиледи. Ошондой эле Кыргызстанды Бириккен Улуттар Уюмунун Коопсуздук Кеңешинин туруктуу эмес мүчөсү болуп шайланышы менен куттуктап, эки өлкөнүн эл аралык аренада өз ара аракеттенүүсүнүн мындан ары да бекемделишине ишенимин билдирди.
Жакшыраак сунуштарды алуу үчүн кириңиз
Азырынча комментарий жок. Биринчи болуңуз!
