Кыргыз Республикасынын Тышкы иштер министри Жээнбек Кулубаев менен Иран Ислам Республикасынын Тышкы иштер министри Сейед Аббас Аракчинин эки тараптуу жолугушуусу Чолпон-Ата шаарында болуп өттү. Бул тууралуу КР Тышкы иштер министрлиги билдирди.
Жолугушуу Шанхай кызматташтык уюмуна мүчө-мамлекеттердин Тышкы иштер министрлеринин кеңешинин жыйынынын алкагында, салттуу достук маанайда өттү.
Тараптар кыргыз-иран мамилелеринин актуалдуу маселелерин талкуулашып, ошондой эле Жакынкы Чыгыштагы жана Парс булуңундагы кырдаалды кошо алганда, аймактык жана эл аралык күн тартибиндеги маселелер боюнча пикир алмашышты.
Шанхай кызматташтык уюму, Ислам Кызматташтык Уюму (ИКУ) жана башка эл аралык уюмдардын алкагында эки өлкөнүн өз ара аракеттенүүсүнө өзгөчө көңүл бурулду. Тараптар кыргыз-иран соода-экономикалык кызматташтыгын мындан ары да чыңдоого өз ара кызыкдар экендиктерин ырасташты.
