Кыргызстандын Өзгөчө кырдаалдар министрлигинин билдирүүсүнө караганда, "Ала-Арча" мамлекеттик жаратылыш паркында Эл аралык жарандык коргонуу уюмуна мүчө-өлкөлөрдүн тоо куткаруучуларынын XII эл аралык окуу-машыгуу жыйындары өтүүдө. Бул машыгуулар тоо шартында куткаруу иштерин жүргүзүү ыкмаларын өркүндөтүүгө багытталган.

Бүгүнкү күндө катышуучулар аскада жүрүү боюнча практикалык сабактарга негизги көңүл буруп жатышат. Куткаруучулар аскалуу жерлерде кыймылдоо, бийиктиктен өйдө-ылдый түшүү, ошондой эле тоолуу аймакта куткаруу иштерин жүргүзүү ыкмаларын өздөштүрүшүүдө.

Мурунку күнү катышуучулар биринчи медициналык жардам көрсөтүү боюнча практикалык сабактардан өтүп, тоодогу жаракаттарда жана башка өзгөчө кырдаалдарда аракеттенүү алгоритмдерин иштеп чыгышкан.

Жыйындардын жүрүшүндө чет элдик адистер кыргызстандык кесиптештери менен биргеликте куткаруу операцияларын жүргүзүүнүн заманбап ыкмаларын өздөштүрүп, тажрыйба алмашууда.

Тоо куткаруу даярдыгы боюнча эл аралык курстар расмий түрдө 4-августта Бишкек шаарында Эл аралык жарандык коргонуу уюмунун колдоосу менен ачылган. Ачылыш аземине Өзгөчө кырдаалдар министринин орун басары Алмазбек Асанов катышкан.

2012-жылдан бери бул курстар куткаруучуларга тажрыйба алмашууга, кесиптик чеберчилигин жогорулатууга жана эл аралык кызматташтыкты бекемдөөгө мүмкүндүк берет.
Алмазбек Асанов, Өзгөчө кырдаалдар министринин орун басары

Машыгуулар 5-августтан 15-августка чейин өтөт. Ага Алжир, Армения, Грузия, Иордания, Марокко, Монголия, Палестина, Орусия, Сауд Арабиясы, Судан жана Тунис өлкөлөрүнөн 11 куткаруучу катышууда.

Катышуучулар бийик тоолуу шарттарда издөө-куткаруу иштерин жүргүзүү боюнча теориялык жана практикалык даярдыктан өтүшөт.