Президент Садыр Жапаров темир жол линиясынын ачылыш аземинде сүйлөп жатып, 63 чакырымдык жол толугу менен бүткөрүлгөнүн билдирди. Курулуш учурунда болжол менен 1 миллион куб метр жардыруу иштери аткарылып, 8 чакырым тоолуу аймак тазаланган.
Жолдун бир чакырымынын курулуш баасы 955 миң долларды түзгөн. Президенттин айтымында, бул долбоор башталганда жакын жана алыскы коңшулар арасында конкурс өткөрүлгөн. Алар бир чакырым темир жолду 4,8 миллиондон 6,8 миллион долларга чейин курууну сунушташкан.
Президент темир жолдун баасын Түндүк-Түштүк альтернативдик жол долбоору менен да салыштырды. Анын айтымында, 433 чакырымдык Балыкчы-Жалал-Абад жолунун бир чакырымын куруу 2,5 миллион долларга бааланган. Ошол эле учурда бул жол толугу менен пайдаланууга бериле элек.
