Шанхай Кызматташтык Уюму саясий, экономикалык жана гуманитардык өз ара аракеттенүү мейкиндиги гана эмес, чоң маалыматтык талаа болуп саналат. Бул жерде өлкөлөр биргелешкен жетишкендиктер жөнүндө айтып, фейктерге, манипуляцияларга жана маалыматтык коркунучтарга каршы чогуу турушу керек. Мындай пикирин "Qazcontent" ААК башкармалыгынын төрагасы Адил Сейфуллин Бишкекте өткөн ШКУ өлкөлөрүнүн медиа жана аналитикалык борборлорунун саммитинде билдирди.
Кыргызстандын Президенттик Администрациясынын маалымат саясаты кызматынын жетекчиси Дайырбек Орунбеков Шанхай Кызматташтык Уюмуна мүчө өлкөлөрдүн жалпыга маалымдоо каражаттарын жана аналитикалык борборлорун маалыматтык манипуляцияга жана жалган жаңылыктардын таралышына каршы биргелешип иштөөгө чакырды.
Орунбековдун айтымында, технологиянын тез өнүгүшү жана маалымат агымынын көбөйүшү шартында журналисттердин жана эксперттик коомчулуктун ролу олуттуу түрдө жогорулады. Ал маалымат коомдук пикирге жана мамлекеттердин келечегине таасир этүүчү эң күчтүү куралдардын бирине айланганын белгиледи.
«Журналисттердин жана аналитиктердин биргелешкен иши маалыматтык манипуляциядан жана жалган жаңылыктардын таралышынан ишенимдүү калкан болуп саналат. Чындык жана элдер ортосундагы ишеним гана туруктуулукка өбөлгө түзөт», — деп баса белгиледи ал.
Маалымат саясаты кызматынын жетекчиси заманбап медиадан ыкчамдыкты, объективдүүлүктү жана терең анализди талап кыларын билдирди. Анын айтымында, сапаттуу журналистика өлкөлөр ортосундагы ишенимди бекемдөөгө жана коомго региондо ишке ашырылып жаткан ири инфраструктуралык, транспорттук жана инвестициялык долбоорлордун маанилүүлүгүн түшүндүрүүгө жардам берет.
