Ысык-Көл районунда VI Кочевниктердин Дүйнөлүк оюндарын өткөрүүгө дайындалып жаткан жаңы кок-бору аянтчасы пайдаланууга берилди. Бул тууралуу оюндардын маданий программасынын башкы режиссеру Алтынбек Максутов Бишкекте өткөн презентацияда билдирди.
Министрликтер биргеликте жаңы аянтча курганын, ал спортчулардын кыялында тургандай заманбап жана ыңгайлуу жасалганын белгилешти. Мисалы, мурда ипподромдо күйөрмандар оюн талаасынан орто эсеп менен 200 метр алыстыкта болсо, эми жаңы аянтчадан оюнду болгону 10 метрден көрүүгө болот.
Жаңы аянтчанын кубаттуулугу 10 миң адамды камтыйт. Ал коопсуздук талаптарына жооп берген, «Формула-1» сыяктуу ири спорттук иш-чараларда колдонулган стандарттар боюнча текшерүүдөн өткөн. Аянтчанын четинде коргоочу тосмолор курулган.
Маданият, маалымат жана жаштар саясаты министрлиги тарабынан курулган аянтчанын конструкциясы жеңил алынуучу элементтерден жасалган. Мындан тышкары, бул жолку оюндарда кок-бору менен катар кок-пар боюнча да мелдештер өтөт.
Максутовдун айтымында, аянтча курууда эки түрдөгү оюндардын өзгөчөлүктөрү эске алынган. Айрым жерлерде кок-пар үчүн атайын шарттар каралган.
